معلومات هامة جدا حول cnss
السلام عليكم
بعض المعلومات تقدر تحتاجها حول cnss الكل كايعرفها ولكن مافيها باس نديرو تذكير
#يلا خرجتي عند الطبيب تأكد باللي كاشا ليك الضوسي ودار ليك الرقم الإستدلالي الوطني inpe حيت يقدرو يرجعو ليك الضوسي على هاد الرقم يلا ماكاينش ويعطيك الفاكتورة وكذلك بالنسبة الصيدليات و المختبرات
#يلا دفعتي الضوسي ديال التطبيب وكتبو ليك DF يعني راه ماعندكش التغطية الصحية واخا كايبان ليك الديكلارسيون ديال النقط طالع راه كاينين الشركات اللي كايتملصو من ديك النسبة ديال 4,11% اللي كايخلص عليك حيت ماشي إجبارية عليه يقدر يݣوليه داير ليه التغطية الصحية عند لاصورانص
droit amo fermé
يلا لقيتي droit amo fermé تقدر تكون الشركة دايرة ليك لاميتييل عند لاصورانص ولا ماعندكش نهائيا
dossier traité
يلا كتبو ليك dossier traité يعني راه الضوسي ديالك تعالج ومن بعد نهار ولا يومين كايطلع ليك شحال رجعو ليك فبلاصت ديك montant
mise a disposition
يلا كتبو ليك mise a disposition يعني راه مادفعتيش ليهوم شهادة بنكية rib كايصيفطو ليك واحد الورقة الدار بمثابة شيك كاتديها البانكة وكاتشد رزقك ويلا ماوصلاتكش سير جيبها عندهوم
envoyer a l'assurer
يلا كتبو ليك envoyer a l'assurer عرف باللي صيفطو ليك الفلوس الحساب ديالك
dossier rejeter
يلا كتبو ليك dossier rejeter الضوسي ديالك ترفض مافيكش شي شرط من الشروط باش تستافد
dossier retourner a l'assuré
يلا كتبو ليكdossier retourner a l'assuré عرف باللي الضوسي ديالك رجعوه ليك خصو شي كاشي ولا شي ورقة ولا شي فاكتورة ولا شي تاريخ غالط ... كايصيفطوه ليك الدار كايجيبو ليك الفاكتور وصلحو وعاود دفعو
dossier accordé
يلا كتبو ليك dossier accordé يعني الضوسي ديالك تقبل وهادي كايديروها بزاف ف بريز اون شارج ولا طلب الموافقة على مرض مزمن ولا الموافقة المسبقة ديال سنان ...
#يلا بغيتي تعرف باللي عندك التغطية الصحية دخل من غوغل اللي ماعارفش يدخل من هاد السطر زرق وكايدخل رقم التسجيل ديالو والمودپاس يلا لقيتي droit amo fermé راه ماعندكش لقيتي ouvert راه عندك وكايديرو ليك التاريخ الصلاحية
https://www.cnss.ma/Portail_cnss/
#باش تخلص على ولادك خصك عل الأقل 18 يوم فالشهر والصالير مايكونش قل من 1620 درهم فالشهر باش تحافظ على 108 نقطة ف 6 اشهر لخرا أما بالنسبة اللي خدام فالقطاع الفلاحي 1142 درهم فالشهر
#السميك حاليا داير2828,71 درهم أما بالنسبة للقطاع الفلاحي داير1994 دراهم
#العيالات فاش تݣلسي من الخدمة بغيتي تولدي ماتنسايش دفعي إشعار بالإنقطاع عن العمل فقل من شهر من نهار ݣلستي من الخدمة باش ماتزرفيش ف 98 يوم ديال الأمومة
#النسبة اللي كايقطعو ليك من الخلصة هي %4,48 ديال cnss و%2,26 ديال التغطية الصحية وكايخلص عليك الپاترون فالمجموع %21,09 وكاين اللي عندو إقتطاعات أخرى بحال التأمين التكميلي والضريبة على الدخل
#يلا داير التأمين الإختياري يعني كاتخلص على راسك راه ماكاتخلصش على الدراري كاتستافد غير من التغطية الصحية والنقط وأقل خلاص فالتأمين الإختياري هو كاتخلص على راسك 1410 دراهم كل 3 أشهر وكاديكلاري راسك بالسميك 2698 درهم
#صحاب كونترا أنابيك راه ماكاتستافد لا من النقط ولا من الديكلارسيون ديال الصالير ولا فلوس الدراري ولا من عطلة الأمومة كاتستافد غير من التغطية الصحية فقط حيت نتا ف نظر القانون غير سطاجير وخا عندك مؤهلات كايبغيو يحرثو عليك ديك 24 شهر فابور والدولة كاتعاونهم ولكن كاينين بعض المشغلين اللي كايخافو الله واخا كونترا انابيك كايستافد من كولشي ولكن هاد المشغلين قلال
#يلا ݣلستي من الخدمة كاتخلص على ولادك 3 اشهر بعد اخر ديكلارسيون والتغطية الصحية 6 أشهر
#الشروط باش تستافد من التعويض على الشوماج خصك تكون عندك 780 يوم ف 3 سنين لخرا فيها 260 يوم فالعام اللخر
#الورقة اللي عمر ليك المشغل ديال فقدان الشغل قبل مادفعها شوف ياكما دار ليك علامة تحت نعم فدوك الخانات اللي لتحت خصو يدير ليك علامة تحت لا فالخانات ب ثلاثة ديال استقالة تخلي عن منصب مغادرة طوعية
تعليقات
إرسال تعليق